पुण्यात MPSC विद्यार्थ्यांचा आक्रोश मोर्चा; अध्यक्षांच्या राजीनाम्यासह पारदर्शक भरतीची मागणी

पुणे |  प्रतिनिधी – मुख्य संपादक – कृष्णा गवळी | चाणक्य NEWS
महाराष्ट्र लोकसेवा आयोगाच्या (MPSC) परीक्षांमधील कथित पेपरफुटी, गैरप्रकार आणि भरती प्रक्रियेतील अनियमिततेच्या निषेधार्थ पुण्यात सोमवारी, ७ सप्टेंबर २०२६ रोजी हजारो स्पर्धा परीक्षार्थींनी आक्रोश मोर्चा काढला.

ओंकारेश्वर मंदिर चौक ते पुणे जिल्हाधिकारी कार्यालय असा हा मोर्चा काढण्यात आला. विद्यार्थ्यांनी MPSC अध्यक्ष आणि सचिव यांच्या राजीनाम्याची मागणी करत परीक्षा प्रक्रियेत पारदर्शकता आणण्याची मागणी केली. तसेच परीक्षांमधील कथित गैरप्रकारांची स्वतंत्र चौकशी आणि फॉरेन्सिक ऑडिट करण्यात यावे, अशी मागणीही आंदोलकांनी केली.
MPSCच्या परीक्षांवरील विश्वास आणि भरती प्रक्रियेतील पारदर्शकता हा विद्यार्थ्यांसाठी अत्यंत महत्त्वाचा मुद्दा असल्याचे आंदोलनकर्त्यांनी सांगितले. विविध परीक्षांमधील अनियमितता, निकालाबाबतचा संभ्रम आणि प्रलंबित मागण्यांमुळे विद्यार्थ्यांमध्ये असंतोष वाढल्याचे वृत्त आहे.

   
आंदोलनादरम्यान विद्यार्थ्यांनी जोरदार घोषणाबाजी करत आपल्या मागण्या मांडल्या. सरकारने तातडीने विद्यार्थ्यांच्या मागण्यांची दखल घ्यावी आणि परीक्षा प्रक्रियेबाबत ठोस उपाययोजना कराव्यात, अशी मागणी करण्यात आली. मागण्यांवर तातडीने सकारात्मक निर्णय न झाल्यास आंदोलन अधिक तीव्र करण्याचा इशाराही विद्यार्थ्यांनी दिला आहे.

विद्यार्थ्यांच्या प्रमुख मागण्या
MPSC अध्यक्ष व सचिव यांच्या राजीनाम्याची मागणी
कथित पेपरफुटी व गैरप्रकारांची उच्चस्तरीय चौकशी
MPSC परीक्षांचे स्वतंत्र फॉरेन्सिक ऑडिट
भरती व परीक्षा प्रक्रियेत अधिक पारदर्शकता
दोषींवर कठोर कारवाई
प्रलंबित भरती प्रक्रिया वेळेत पूर्ण करण्याची मागणी