उदगीर ग्रामीण पोलिसांची धडक कारवाई! थारसह १४.४८ लाखांचा मुद्देमाल जप्त; एकाला अटक

लातूर | जिल्हा प्रतिनिधी – माधव चलमले | चाणक्य NEWS

महाराष्ट्रात प्रतिबंधित असलेल्या गुटखा आणि सुगंधित तंबाखूची अवैध वाहतूक करणाऱ्यांविरोधात उदगीर ग्रामीण पोलिसांनी मोठी कारवाई केली आहे. उदगीर शहरातील ठाकरे चौक, बिदर गेट परिसरात नाकाबंदी दरम्यान महिंद्रा थार गाडीतून प्रतिबंधित पान मसाला व सुगंधित तंबाखूचा साठा जप्त करण्यात आला. या कारवाईत पोलिसांनी थार गाडीसह एकूण १४ लाख ४८ हजार ५३८ रुपयांचा मुद्देमाल जप्त केला असून, एका आरोपीला अटक केली आहे.

🔴 नाकाबंदीदरम्यान संशयास्पद थार पोलिसांच्या जाळ्यात!

मिळालेल्या माहितीनुसार, गुरुवारी रात्री सुमारे १० वाजण्याच्या सुमारास उदगीर ग्रामीण पोलीस ठाण्याचे पथक गस्तीवर असताना ठाकरे चौक, बिदर गेट परिसरात कर्नाटकातील बिदर येथून येणारी महिंद्रा थार (क्रमांक MH 24 BR 7722) पोलिसांना संशयास्पदरीत्या येताना दिसली. पोलिसांनी तत्काळ वाहन थांबवून त्याची झडती घेतली. यावेळी गाडीमध्ये पोत्यांत भरून ठेवलेला महाराष्ट्रात प्रतिबंधित असलेला पान मसाला आणि सुगंधित तंबाखूचा साठा आढळून आला.

🔴 विमल, व्ही-१, राज निवाससह जाफरानी जर्दा जप्त

पोलिसांनी केलेल्या तपासणीत वाहनातून विमल पान मसाला, व्ही-१ तंबाखू, राज निवास सुगंधित पान मसाला आणि जाफरानी जर्दा अशा विविध प्रकारच्या प्रतिबंधित पदार्थांचे एकूण २ हजार १३८ पुडे जप्त केले.

जप्त मुद्देमालाचा तपशील पुढीलप्रमाणे :

– प्रतिबंधित गुटखा व तंबाखू: २ लाख ४८ हजार ५३८ रुपये
– महिंद्रा थार गाडी: १२ लाख रुपये
– एकूण जप्त मुद्देमाल: १४ लाख ४८ हजार ५३८ रुपये

🔴 आरोपीला अटक; पुढील तपास सुरू

या प्रकरणी शेख असलम शेख गौस (वय ३५) याच्याविरुद्ध उदगीर ग्रामीण पोलीस ठाण्यात गुन्हा रजिस्टर क्रमांक ७२८/२०२६ नुसार गुन्हा दाखल करण्यात आला आहे. भारतीय न्याय संहिता (BNS) कलम १२३, २२३, २७४, २७५ तसेच अन्न सुरक्षा आणि मानके कायदा, २००६ मधील कलम ५९ अन्वये कारवाई करण्यात आली असून, आरोपीला अटक करण्यात आली आहे.

या प्रकरणाचा पुढील तपास पोलीस उपनिरीक्षक नरवटे करीत आहेत.

🚨 प्रतिबंधित पदार्थांच्या अवैध वाहतुकीवर पोलिसांचा वॉच!

महाराष्ट्रात प्रतिबंधित असलेल्या गुटखा आणि तंबाखूजन्य पदार्थांच्या अवैध वाहतुकीविरोधात उदगीर ग्रामीण पोलिसांनी केलेल्या या कारवाईमुळे अशा प्रकारच्या व्यवहारांवर नियंत्रण ठेवण्याच्या पोलिसांच्या प्रयत्नांना महत्त्व प्राप्त झाले आहे. सीमावर्ती भागातून होणाऱ्या संशयास्पद वाहतुकीवर पोलिसांची नजर असल्याचे या कारवाईतून स्पष्ट झाले आहे.

चाणक्य NEWS — लोकशाहीचा निर्भय आवाज!