पुणे | प्रतिनिधी – उप-संपादक – सीताराम गायकवाड | चाणक्य NEWS
राष्ट्रपिता महात्मा गांधी यांच्या जयंतीनिमित्त आणि राष्ट्रीय स्वच्छता दिनाचे औचित्य साधून रुचा सामाजिक संस्थेतर्फे प्रभाग क्रमांक २ मध्ये सफाई सेवकांसाठी विशेष कृतज्ञता सन्मान सोहळ्याचे आयोजन करण्यात आले. परिसर स्वच्छ आणि सुंदर ठेवण्यासाठी अहोरात्र मेहनत घेणाऱ्या तब्बल ७५ सफाई सेवकांचा सन्मान करून त्यांच्या कार्याप्रती कृतज्ञता व्यक्त करण्यात आली.
🎖️ ७५ सफाई सेवकांचा सन्मान; उपयुक्त भेटवस्तूंचे वाटप
या उपक्रमांतर्गत सर्व सफाई सेवकांना संस्थेचा लोगो असलेली आकर्षक पिशवी, पौष्टिक नाश्ता आणि पाण्याची बाटली देऊन सन्मानित करण्यात आले. सफाई सेवकांच्या योगदानाची दखल घेत त्यांच्याप्रती आदर आणि कृतज्ञता व्यक्त करण्याचा हा उपक्रम ठरला.
🌱 वृक्षारोपणातून पर्यावरण संवर्धनाचा संदेश
सामाजिक बांधिलकी जपत या कार्यक्रमात पिंपळाच्या रोपाचे वृक्षारोपण करण्यात आले. स्वच्छतेसोबतच पर्यावरणाचे संवर्धन आणि वृक्षांचे जतन करण्याचा संदेशही या माध्यमातून देण्यात आला.
मान्यवरांची उपस्थिती
या कार्यक्रमाला पुणे महानगरपालिकेचे मुकादम भालेराव, नितीन ससाने सर, रुचा सामाजिक संस्थेचे अध्यक्ष तुकाराम पाटोळे, सचिव अनिता पाटोळे, समाजसेविका मंगलताई गायकवाड तसेच संस्थेचे सल्लागार, लेखक व निवेदक अमरजित गायकवाड सर यांची प्रमुख उपस्थिती होती.
स्वच्छता आणि आरोग्याबाबत मार्गदर्शन
यावेळी संस्थेच्या सचिव सौ. अनिता पाटोळे यांनी उपस्थित सफाई सेवकांना स्वच्छतेचे महत्त्व, सामाजिक जबाबदारी आणि स्वच्छ परिसर राखण्याबाबत मार्गदर्शन केले. तसेच अमरजित गायकवाड यांनी स्वच्छतेच्या सवयी, वैयक्तिक आरोग्य आणि आरोग्यदायी जीवनशैली यांविषयी मोलाची माहिती दिली.
कार्यक्रमाच्या शेवटी संस्थेचे अध्यक्ष तुकाराम पाटोळे यांनी सर्व मान्यवर, उपस्थित नागरिक आणि सफाई सेवकांचे आभार मानले. आभारप्रदर्शनाने सोहळ्याची सांगता झाली.
स्वच्छता राखणाऱ्या हातांचा सन्मान, त्यांच्या श्रमांप्रती कृतज्ञतेची भावना आणि पर्यावरण संवर्धनाचा संदेश यांचा सुंदर संगम या उपक्रमातून पाहायला मिळाला. रुचा सामाजिक संस्थेच्या या सामाजिक उपक्रमाचे सर्व स्तरांतून कौतुक होत आहे.
— चाणक्य NEWS
लोकशाहीचा निर्भय आवाज !
